Edhe ish-kryeministri Isa Mustafa ia ka “dhënë” dorën kryeparlamentarit Glauk Konjufca, i cili e ka pranuar rëndësinë e letrës së Federica Mogherini për Asociacionit.

Ish-kryeministri i Kosovës, Isa Mustafa, ka vlerësuar se është shumë e rëndësishme që kryetari i Kuvendit të Kosovës, Glauk Konjufa, e ka kuptuar rëndësinë e letrës së Frederica Mogherinit, e cila flet për natyrën e kompetence të Asociacionit.

Ai ka thënë se është e rëndësishme që disa zyrtarë të LV-së tashmë e kanë kuptuar vlerën e kësaj letre dhe rolin përfundimtar të Gjykatës Kushtetuese në procesin e formimit të Asociacionit të komunave me shumicë serbe.

Mustafa ka vlerësuar se në politikë nuk është e lehtë të pranohet e vërteta. Sipas tij, në politikë njerëzit parapëlqejnë më shumë gënjeshtrat dhe mashtrimin.

Mustafa ka treguar se të gjithë zyrtarët e LV-së, përfshirë kryeministrin Kurti, kanë qenë në dijeni për ekzistimin e letrës së ish-shefes së diplomacisë evropiane.

“Është me rëndësi që disa prej tyre e kanë kuptuar. Sidomos z. Konjufca. Në politikë nuk është lehtë të thuhet dhe të pranohet e vërteta. Sepse, njerëzit parapëlqejnë më shumë gënjeshtrat dhe mashtrimin, jetojnë me premtimet dhe jo me realitetin”, ka thënë Mustafa për “Nacionalen”.

Ish-kryeministri ka thënë se LV-së dhe Kurtit në atë kohë nuk iu ka interesuar përmbajtja e letrës.

“Kurti e ka ditë për letrën. Kam folur për te dhe e kam bërë publike. Por, nuk iu ka interesuar fare. Kanë këmbëngulë “Zajednica nuk kalon”. Kanë ofenduar dhe kërcënuar…”, ka thënë Mustafa.