Sot mbushen 25 vjet nga themelimi i Brigadës 137 “Gjakova”, i cili përbën një nga kapitujt më të rëndësishëm të luftës në Gjakovë dhe Kosovë.

Themelimi i kësaj brigade ishte bërë me urdhrin e komandantit të Zonës Operative të Dukagjinit, Ramush Haradinaj.

Kjo brigadë u ngrit pas kërkesave të ushtarëve gjakovarë të UÇK-së për ndërhyrje në qytetin e tyre, me qëllim të ndalimit të masakrave dhe krimeve të ushtrisë serbe ndaj civilëve në këtë komunë.

Më 28 mars 1999 nga fshati Dashinoc, Komandant i ZOD-it, Ramush Haradinaj jep urdhëresën me nr. L8/862/99 për krijimin e njësitit në shkallë Brigade, të emërtuar Brigada 137 “Gjakova” e UÇK- së, bashkë me emërtimin e kuadrit komandues.

Një ditë pas themelimit, më 29 mars 1999 kjo brigadë me shumë pjesëtarë të armatosur, u futen në qytetin e Gjakovës.

Brigada ishte e ndarë në 4 grupe, të cilat ishin vendosur në katër pozicione të qytetit, si pikat më të mira strategjike të mundshme për zhvillimin e aktivitetit ushtarak të kësaj brigade.

Tri grupet dhe Shtabi i Brigadës ishin vendosur në lagjet e Çabratit dhe një grupi vendoset në Orize. Në kuadër të detyrave të parashtruara, luftëtarët e kësaj brigade ndërmorën aksione të shumta për mbrojtjen e popullatës civile të Gjakovës.

Veçohet “Epopeja e Çabratit” kur në luftën frontale me armikun, në një distancë të afërt, në datat 7, 8 dhe 9 maj ranë heroikisht 17 dëshmorë të kësaj brigade.

Kjo urdhërese sipas një dokumenti të nënshkruar nga Komandanti i Zonës së Dukagjinit, Ramush Haradinaj i ishte dedikuar Eprorit Metali Perolli.

Në këtë vendim shkruhej:

Pas rrethanave të vështira të krijuara me qëllim të shpëtimit të popullatës dhe situatës luftarake në tërësi në gjendje të jashtëzakonshme lufte lëshoi këtë urdhëresë:

Urdhëroj:

Krijimin e një njësie të re në shkallë Brigade e emëruar 137 “Gjakova” me komandant Brigade, eprorin Agron Kryeziu.

Eprorin Agron Kryeziu e bëjë përgjegjës për kryerjen e detyrave luftarake të marruara nga Komanda e Zonës dhe të daluara nga situatat e krijuara në rajonin operues.

Ndërsa eprorin:

Abdullah Babalia e emëroj Zëvendëskomandant të Brigadës;

Myslim Dobrunën, Ndihmës komandant për Moral,

Afrim Dedën, Ndihmës komandant për Logjistikë,

Metali Perollin, Komandant të batalionit të -I-rë,

Lekë Stubllën, Zëvendëskomandant të Batalionit të -I-rë dhe Komandant të Kompanisë së -I-rë,

Bernard Idrizin, Komandant të togës së -I-rë, të Kompanisë së -I-rë, të Batalionit të -I-rë,

Milot Rokën, Komandant të togës së -II-të, të Kompanisë së -I-rë, të Batalionit të -I-rë,

Hekuran Hodën, Komandant të togës së -III-të, të Kompanisë së -I-rë të batalionit të -I-rë,

Pinçon e emëroj, Komandant të njësisë Komando,

Besim Vokshin, Ndihmës komandant për policinë ushtarake (PU).

Thuhet në fund të urdhëresës së nënshkruar nga komandanti i Zonës së Dukagjinit, Ramush Haradinaj e cila mbanë datën 28 mars 1999, dhe është ë përpiluar nga (E.XH).