Kryetari i Sindikatës së Bashkuar të Arsimit, Kulturës dhe Shkencës (SBAShK), Rrahman Jasharaj, ka thënë se në takimin sotëm që kanë pasur me ministrin e Arsimit, Ramë Likaj dhe me drejtorët e drejtorive komunale të Arsimit, janë pajtuar që mësimi të nisë në objekte shkollore.

“Nga DKA-të u tha se janë bërë përgatitjet. Kjo nuk varet as nga ne dhe të tjerët por nga vlerësimi që do të bëjë IKShPK-ja. Ata kanë shprehur gatishmëri që mësimi të nisë në objekte shkollore. Klasat e mëdha do të zbërthehen në grupe më të vogla dhe të ketë distancë të mjaftueshme”.

“Është përfolur se shteti do të gjejë mjete që të bëjë një test ( për Covid) në nivel vendi, duke përzgjedhur mësimdhënës nga komunat që janë më të moshuar apo shëndetligë”, ka thënë Jasharaj për “Klan Kosova”.

Ai ka theksuar se njëherë do të testohen kjo kategori e mësimdhënëse, kurse pastaj pjesa tjetër.

Sipas Jasharajt në nivel vendi janë rreth 300 mësimdhënës me problem të ndryshme shëndetësore që nuk do të duhej ta nisnin vitin e ri shkollor.

“Këta duhet t’i ruajmë. Qeveria duhet të lëshojë një vendim për kontingjentin e një mijë mësimdhënësve që të mos mbesin as andej e as këndej. Për mjekësinë është lëshuar kontingjenti shtesë dhe duhet të bëhet kështu edhe me mësimdhënësit”.