Në Gjykatën Themelore në Prishtinë, në shqyrtimin gjyqësor të së mërkurës në rastin e njohur si “53-milionëshi” është dëgjuar në cilësinë e dëshmitarit Bedri Hamza, ish-ministër i Financave, i cili ka thënë se për procedurat e pagesës dhe marrëveshjes së shumë prej 53 milionë eurove, e kishte autorizuar zëvendësministrin Fatmir Gashi dhe se vetë nuk ka qenë i përfshirë në asnjë fazë të procesit.

“E nderuar kryetare e trupit gjykues edhe para organeve kompetente kam deklaruar e sot e ripërsëris se unë nuk kam qenë pjesë e këtij procesi dhe këtë çështje e kam pas të deleguar me autorizim të veçantë tek njëri nga zëvendësministrat, në këtë rast zotëri Fatmir Gashi”, ka thënë Hamza.

Këtë deklarim, Hamza e ka bërë duke u përgjigjur në pyetjet e prokurorit special, Atdhe Dema, në rastin ku të akuzuar për keqpërdorim të detyrës zyrtare janë ish-ministri i Infrastrukturës Pal Lekaj, Eset Berisha, këshilltar i lartë politik i Pal Lekajt, Nebih Shatri, ish-sekretar i përgjithshëm në Ministrinë e Infrastrukturës (MI) si dhe Besim Tahiri, drejtor i Prokurimit Publik në këtë ministri, raporton “Betimi për Drejtësi”.

Hamza ka thënë se arsyeja se përse nuk ka qenë pjesë e procedurave të Komitetit Ndërministror për ndërtimin e autoudhës Prishtinë-Hani i Elezit është se ka pasur një volum të madh të punëve, andaj edhe ka autorizuar zëvendësin e tij, Fatmir Gashin.

Dëshmitari Hamza ka thënë se Ministria e Financave nuk ka bërë mbikëqyrjen e projektit dhe se mbikëqyrjen e ka për detyrë ministria e linjës përkatëse.

Më tutje, Hamza ka thënë se sipas dijenisë së tij, kontrata bazë për ndërtimin e autoudhës Prishtinë- Hani i Elezit duhet të përmbajë nenet të veçanta ku specifikohen detyrimet shtesë.

Hamza ka sqaruar se lidhur me vendimin për rekomandimin Qeverisë së Kosovës që të aprovojë kërkesën e “Bechtel & Enka” për pagesën shtesë prej 53.1 milionë eurosh nuk ka pasur asnjë bisedë me zëvendësin Gashi.

“Me sa jam në dijeni, nuk kemi biseduar për këtë çështje”, ka thënë Hamza.

Po ashtu, dëshmitari Hamza, ka thënë se për veprimet që ka ndërmarrë zëvendësi Gashi, nuk e ka këshilluar se si të veprojë pasi ka qenë në kuadër të përgjegjësive të tij si i autorizuar në Komitetin Ndërministror.

Ai ka thënë se ka njohuri për kompaninë “Hill International”, e cila kompani sipas tij ka qenë përgjegjëse për mbikëqyrjen e zbatimit të kontratës për ndërtimin e autoudhës Prishtinë-Hani Elezit.

Dëshmitari Hamza ka sqaruar se kompania “Bechtel & Enka” ka mundur që të bëjë zvogëlimin e dinamikës së punimeve si rezultat i mospërcjelljes me pagesa në mënyrë të rregullt dhe se sipas tij është dashur të ketë një koordinim midis palëve kontraktuese.

Lidhur me mënyrën e pagesave, dëshmitari Hamza ka thënë se janë dokumentet zyrtare që dëshmojnë për secilën periudhë kohore se a janë bërë pagesat me rregull dhe brenda afateve ligjore apo jo.

Po ashtu, ai ka deklaruar se me të marrë detyrën e tij si ministër i Financave në shtator të 2017-ës, ka bërë të gjitha pagesat e nevojshme qofshin edhe ato për periudhat paraprake si dhe shtesë prej 53.1 milionë eurosh obligime buxhetore të papërfunduara.

Lidhur me përmbajtjen e kontratës, Hamza ka thënë se kontrata midis Ministrisë së Infrastrukturës dhe kompanisë “Bechtel & Enka”, ka qenë një dokument i klasifikuar, e që sipas do të thotë se qasja në kontratë ka paraparë procedura të veçanta.

Sipas dëshmitari Hamza, në rast të mosrespektimit të afateve ligjore për ekzekutimin e pagesave, pala kontraktuese në këtë rast “Bechtel & Enka” mund t’i drejtohej përmbaruesit privat ose arbitrazhit.

Në këtë seancë, sipas kryetares së trupit gjykues, gjykatëses Violeta Namani, i ftuar në cilësi të dëshmitarit ka qenë edhe Fatmir Krasniqi, por i njëjti ka njoftuar gjykatën se për shkak të disa rrethanave familjare gjendet jashtë shtetit dhe ditën e hënë mund të japë dëshminë e tij.

Në mungesë të dëshmitari Krasniqi, seanca është ndërprerë për të vazhduar nesër (e enjte), ku pritet të japë dëshminë Besnik Avdijaj.

Bedri Hamza nis dëshminë në rastin e “53-milionëshit”