Ish-kryeministri i Kosovës, Avdullah Hoti, ka njoftuar se do të kërkojë besimin e delegatëve për të udhëhequr Lidhjen Demokratike të Kosovës (LDK), pas dorëheqjes së kryetarit aktual, Lumir Abdixhiku, si pasojë e rezultatit të fundit zgjedhor.

Përmes një deklarate drejtuar strukturave të partisë, Hoti bëri të ditur se kandidatura e tij do të formalizohet në mbledhjen e Kuvendit të LDK-së, e cila pritet të mbahet më 31 janar 2026.
Ai ka shprehur mirënjohje për kontributin e udhëheqjes së deritanishme të LDK-së gjatë pesë viteve të fundit, duke falënderuar veçanërisht kryetarin Abdixhiku, Kryesinë, degët, nëndegët, si dhe Forumet e Gruas dhe të Rinisë në mbarë Kosovën. Hoti theksoi se anëtarësia e LDK-së mbetet shtylla kryesore mbi të cilën ka qëndruar dhe do të qëndrojë partia.

Në këtë fazë që ai e cilëson vendimtare për LDK-në dhe për Kosovën, Hoti është zotuar të marrë përgjegjësinë për ringritjen politike dhe organizative të partisë. Ai ka premtuar një proces gjithëpërfshirës dhe transparent, në përputhje të plotë me Statutin e LDK-së, ku çdo anëtar, degë dhe forum do të ketë rol aktiv në vendimmarrje.
Sipas Hotit, synimi është ndërtimi i një LDK-je të hapur, të drejtë dhe konkurruese, ku avancimi bazohet në meritë, integritet dhe përkushtim, duke krijuar hapësirë të veçantë për profesionistët, gratë dhe të rinjtë, si dhe duke bashkuar energjinë e re me përvojën politike.
Ai ka vlerësuar se potenciali i LDK-së është shumë më i madh dhe ka theksuar nevojën për ta rikthyer partinë në forcën kryesore politike dhe qeverisëse në Republikën e Kosovës, në shërbim të qytetarëve dhe të interesit shtetëror.

Në fund, Hoti ka bërë thirrje për unitet dhe bashkim rreth vlerave themeltare të LDK-së, si demokracia e brendshme, guximi politik, vizioni shtetformues dhe orientimi i palëkundur euro-atlantik, duke theksuar se këto parime janë thelbësore për të ardhmen e partisë dhe të vendit.

Njoftimi i plotë i Hotit:

Të nderuar anëtarë të LDK-së,
Të nderuara struktura të degëve, nëndegëve, të Forumit të Gruas dhe Forumit të Rinisë,
Të nderuar anëtarë të Këshillit të Përgjithshëm të LDK-së dhe të Kryesisë së LDK-së,
Të nderuar delegatë të Kuvendit të LDK-së,

Pas dorëheqjes së Kryetarit Abdixhiku për shkak të rezultatit të fundit zgjedhor, ju njoftoj se në mbledhjen e Kuvendit të LDK-së të datës 31 janar 2026 do të kërkoj besimin tuaj për t’i prirë Lidhjes Demokratike të Kosovës.

Me këtë rast, falënderoj të gjitha strukturat drejtuese të LDK-së për përkushtimin në udhëheqjen e LDK-së në pesë vitet e fundit: Kryetarin Abdixhiku, kolegët e Kryesisë, të degëve e nëndegëve dhe forumet anekënd Kosovës. Mirënjohja ime e thellë shkon, para së gjithash, për anëtarësinë besnike të LDK-së — shtyllën mbi të cilën kjo parti ka qëndruar dhe do të qëndrojë gjithmonë.

Në këtë moment vendimtar për LDK-në dhe për Kosovën, unë zotohem me përgjegjësi të plotë të marr barrën e ringritjes politike dhe organizative të partisë. Zotohem të udhëheq një proces tërësisht gjithëpërfshirës, transparent dhe në përputhje të plotë me Statutin, ku secili anëtar, çdo degë dhe çdo forum ka zë dhe rol aktiv në ringritjen e LDK-së dhe në vendimet që marrim si shtëpi politike e demokracisë.

Zotohem se askush nuk do të mbetet në margjina. Se do të ndërtojmë një LDK të hapur, të drejtë dhe konkurruese. Një LDK ku avancimi bazohet në meritë, integritet dhe përkushtim; ku profesionistët, gratë dhe të rinjtë e gjejnë hapësirën që u takon; dhe ku energjia e re bashkohet me përvojën për ta kthyer LDK-në në alternativën kryesore qeverisëse të Republikës së Kosovës.

Jam thellësisht i bindur se potenciali i LDK-së është shumë më i madh. Është koha që këtë potencial ta çlirojmë dhe ta kanalizojmë për ta kthyer LDK-në në forcën politike kryesore në Republikën e Kosovës, në shërbim të qytetarëve dhe të interesit shtetëror.

Të gjithë së bashku do t’i rikthejmë dhe forcojmë vlerat tona themeltare: demokracinë e brendshme, guximin politik për të marrë përgjegjësi, vizionin shtetformues dhe orientimin e palëkundur euro-atlantik. Këto vlera nuk janë kujtim i një të kaluare të lavdishme — ato janë të domosdoshme për të ardhmen tonë. Vetëm duke u kthyer tek to, me vendosmëri dhe unitet, do ta rikthejmë LDK-në në ballë të proceseve demokratike dhe shtetërore të Republikës së Kosovës.

Ky është momenti për bashkim. Për maturi. Për guxim politik. Për një fillim të ri që ndërtohet mbi parime, besim dhe vizion.

Zoti e bekoftë Lidhjen Demokratike të Kosovës!
Zoti e bekoftë Republikën e Kosovës!