Avokati i Kadri Veselit, Rodney Dixon, ka kërkuar nga Gjykata Speciale që të ketë kujdes nga dëshmitë e dhëna nga Serbia.

Përveç kësaj, ai ka thënë se mbështetja e autoriteteve ndaj kësaj gjykate duhet të merret parasysh, raporton “Betimi për Drejtësi”.

“Autoritetet serbe dhe mbështetja e tyre për këtë gjykatë po ashtu duhet të merren parasysh në veçanti kur flitet për qëllime forenzike për vlerësimin e provave që ata i kanë dhënë gjykatës”,  ka thënë Dixon gjatë paraqitjes së deklaratës përfundimtare në rastin e liderëve të UÇK-së.

Avokati Dixon ka thënë se nuk është e ndershme në aspektin intelektual që të argumentosh që mund të anashkalosh politikat serbe.

“Sikurse e kam theksuar edhe më herët, në aspektin intelektual nuk është e ndershme që të argumentosh që mund të anashkalosh politikat serbe dhe dominim serb, ndërkohë që vlerësohet nëse UÇK-ja ka pasur në thelb të njëjtën politikë dhe në të njëjtën kohë të thuash se ka shkuar në drejtim tjetër”, ka thënë ai.

Avokati i Veselit ka thënë se Serbia ka kryer aparteid në Kosovë ngjashëm si në Afrikën e Jugut. Por, dallimi sipas Dixonit është që Serbia është munduar të gjykojë ata që kishin vuajtur nën sistemin e tyre, ndërsa në Afrikën e Jugut, ekzekutorët kishin pranuar fajin.

Përpara kësaj, Dixon ka thënë se Dhomat e Specializuara të Kosovës (DhSK) në Hagë janë të rëndësishme për Kosovën në aspekt të sundimit të ligjit.

“Rëndësia e DhSK-së për Kosovën është absolutisht e rëndësishme për sundimin e ligjit dhe për pajtime të ardhshme, edhe për një vend të tillë të botës që nuk është në qendër të vëmendjes së botës apo që nuk tërheq vëmendje kryesore në titujt e gazetave ose të lajmeve kryesore, përsëri është e rëndësishme që të merret parasysh e gjithë mbështetja e vendit për këtë gjykatë”, ka thënë  Dixon.