Kryeministri i Kosovës, Albin Kurti, ka nisur një seri takimesh me liderët e partive opozitare për të diskutuar procesin e zgjedhjes së presidentit të ri, në përpjekje për të shmangur një krizë të re institucionale dhe mundësinë e zgjedhjeve të parakohshme.

Pas takimit me kryetarin e Lidhja Demokratike e Kosovës, Lumir Abdixhiku, Kurti deklaroi se aktualisht nuk ka një emër të posaçëm për postin e presidentit. I pyetur nëse mund të propozohet sërish presidentja aktuale, Vjosa Osmani, ai nuk dha një përgjigje të prerë, duke theksuar mungesën e votave të mjaftueshme për të garantuar zgjedhjen.

“Ne nuk kemi mbledhur nënshkrime për askënd, sepse edhe në rastin më të mirë mund të arrijmë në 66 vota, por jo në 80. Mund të nxjerrim kandidat, por 66 është shumë larg 80. Do të ishte e dëmshme të nxjerrim kandidat ndërkohë që kemi mbetur te ky numër,” u shpreh Kurti.

Sipas Kushtetutës, në dy raundet e para për zgjedhjen e presidentit kërkohen 80 vota nga 120 deputetë, ndërsa në raundin e tretë mjaftojnë 61 vota. Një kandidat duhet të sigurojë fillimisht të paktën 30 nënshkrime për të hyrë në garë.

Nga ana e tij, Abdixhiku bëri të ditur se në takim janë diskutuar dy rrugë të mundshme: arritja e një konsensusi të gjerë politik brenda nëntë ditëve të mbetura nga afati kushtetues, ose një marrëveshje klasike politike mes partive.

“Dakordimi i përgjithshëm është se ka vetëm dy rrugë: ose konsensus politik mes faktorëve të vendit, ose marrëveshje politike mes partive. Në të dyja rastet duhen dy të tretat e votave,” tha ai, duke shtuar se palët do të vazhdojnë takimet në ditët në vijim.

Mbrëmjen e së dielës, Kurti u takua edhe me kryetarin e Partisë Demokratike e Kosovës, Bedri Hamza. Ky i fundit theksoi se zgjedhja e presidentit është përgjegjësi e përbashkët e të gjitha forcave politike.

“Si subjekt opozitar, nuk do të jemi pengesë e proceseve shtetërore, por nuk do të mbështesim kandidatura që nuk përfaqësojnë unitetin qytetar dhe frymën kushtetuese,” deklaroi Hamza, duke bërë thirrje për reflektim dhe shmangie të kalkulimeve afatshkurtra partiake.

Mandati i presidentes Osmani përfundon në fillim të prillit, ndërsa sipas afateve kushtetuese, presidenti i ri duhet të zgjidhet deri më 4 mars. Osmani ka shprehur ambicien për një mandat të dytë pesëvjeçar, por ende nuk është e qartë nëse gëzon mbështetjen e nevojshme parlamentare./ Reporteri.net/