Kryetari i Aleancës Kosovare të Bizneseve, Agim Shahini, ka theksuar se po ndjek me shqetësim situatën kritike në Ngushticën e Hormuzit, ku forcat detare të Iranit kanë paralajmëruar se anijet nuk lejohet të kalojnë, duke bllokuar praktikisht trafikun e shumë tankerëve dhe cisternave të naftës.

“Sipas raportimeve ndërkombëtare qindra cisterna dhe tankerë janë ndalur dhe kanë vështirësi për qarkullim ose po presin pranë rajonit, potencialisht mund të jenë të bllokuara qindra miliona deri në 1 miliard fuçi nafte. Ngushtica e Hormuzit transporton rreth 20% të furnizimit global me naftë. Kjo naftë kryesisht vjen nga vendet e Gjirit Persik si Arabia Saudite, Emiratet e Bashkuara Arabe, Kuvajti, Irani dhe Iraku, dhe destinacionet kryesore janë Evropa, Kina, India, Japonia dhe vendet e tjera të Azisë, duke e bërë çdo bllokim një kërcënim serioz për furnizimin global”, ka thënë Shahini.

Ai ka theksuar se kjo situatë mund të shkaktojë rritje të menjëhershme të çmimeve të derivateve, goditje për transportin dhe industrinë globale, por edhe ndikim të drejtpërdrejtë edhe në ekonominë e Kosovës, pasi sipas tij, ne nuk posedojmë rezerva të mjaftueshme të derivateve.

“AKB vlerëson se zhvillimet gjeopolitike dhe ushtarake po ndikojnë drejtpërdrejt në stabilitetin ekonomik dhe kërkon nga institucionet që të jenë të përgatitura për çdo skenar në tregun e energjisë. Nafta është siguri ekonomike e një shteti”, tha Agim Shahini, kryetar i AKB-së.