Juristi Faton Fetahu ka reaguar pasi Vjosa Osmani procedoi në Kuvend amendamentet kushtetuese për zgjedhjen e drejtpërdrejtë të presidentit.

Amendamentet janë hartuar nga Komisioni për amendamentimin e Kushtetutës në vitin 2011.

Fetahu e ka cilësuar nismën si “të papërgjegjshme dhe juridikisht absurde”.

“Nisma për procedimin dhe votimin e amendamenteve që janë shpallur në kundërshtim me Kushtetutën është e papërgjegjshme”, ka deklaruar ai për gazetën Express.

Ai i është referuar edhe vendimeve të Gjykatës Kushtetuese e Republikës së Kosovës.

Sipas Fetahut, në aktgjykimet KO29/12 dhe KO48/12 është konstatuar se Amendamenti 3 bie ndesh me Kapitullin II të Kushtetutës.

“Si mund të propozohet për votim një amendament që nuk ka kaluar testin kushtetues?”, ka pyetur ai.

Sipas tij, një veprim i tillë përbën “mungesë elementare të njohjes së Kushtetutës”.