Kombëtarja e Kosova nuk arriti të realizonte ëndrrën për të shkuar në Botërorin 2026, pasi u mposht me rezultat 0:1 nga Turqia në finalen e play-off-it, ndeshjen vendimtare për kualifikim.

Ndeshja nisi me një presion të lartë të Kosovës, pas një fillimi më të mirë të Turqisë. Në minutën e 9-të, Turqia rrezikoi me Kenan Yildiz, por topi përfundoi në goditje këndi. Kosova reagoi me sulme të bukura: Vojvoda harkoi, por topi përfundoi në duart e portierit Cakir, ndërsa Hoxha provoi në minutën e 21-të, por u bllokua nga mbrojtja. Goditja nga këndi solli një harkim te Hajrizi, i cili gjuajti akrobatikisht, por shumë lartë mbi portë. Në minutën e 24-të, pasimi i Asllanit te Muriqi u ndërpre nga portieri turk Cakir. Më pas, në minutën e 28-të, Muriqi kërkoi penallti, por gjyqtari Oliver lejoi lojën të vazhdojë. Vetëm një minutë më pas, Asllani goditi traversën, ndërsa Muriqi nuk arriti të shënojë nga afërsia. Në minutën e 45+1′, Hajdari dhe Artukoglu morën karton të verdhë.

Në minutën e 53-të të pjesës së dytë, Kerem Akturkoglu realizoi nga afërsia, duke e dërguar topin në rrjetë për 0:1 dhe duke vendosur fatin e ndeshjes. Pas golit, Kosova nuk u dorëzua; Zhegrova u fut si zëvendësues, ndërsa Rashica dhe Muriqi vazhduan përpjekjet në fazën sulmuese. Në minutën e 70-të, u bë edhe zëvendësimi tjetër, duke përmirësuar energjinë e skuadrës. Në minutën e 72-të, Zhegrova harkoi, por topi përfundoi jashtë. Në minutën e 80-të, Muslija gjuajti bukur nga distanca, por topi goditi shtyllën. Në kohën shtesë të ndeshjes, Dellova gjuajti mbi portë (90+4’), por rezultati mbeti 0:1.

Edhe pse rezultati nuk ndryshoi deri në fund, Dardanët treguan karakter dhe luftuan deri në sekondën e fundit, duke mbajtur gjallë shpresën për të ardhmen dhe duke treguar se janë një skuadër që nuk dorëzohet lehtë.