Presidenti amerikan, Donald Trump mbajti një fjalim të mërkurën në mbrëmje për të deklaruar se lufta njëmujore në Iran është një sukses “që po i afrohet përfundimit”, pavarësisht një konflikti në përshkallëzim që ka shkaktuar trazira ekonomike në mbarë botën.

Në deklaratat nga Shtëpia e Bardhë, Trump argumentoi se “udhëtimi i vogël” i SHBA-së drejt Iranit kishte arritur pothuajse të gjitha objektivat ushtarake të Amerikës, por dha pak qartësi se si planifikon ta përfundojë konfliktin gjatë “dy deri në tre javëve” të ardhshme.

“Jemi në prag të përfundimit të kërcënimit të errët të Iranit ndaj Amerikës dhe botës,” tha Trump në fjalimin 19-minutësh, të mbajtur nga Cross Hall i Shtëpisë së Bardhë. “Ne i kemi të gjitha letrat. Ata nuk kanë asgjë”, tha Trump.

Duke pranuar dhimbjen ekonomike të shkaktuar nga konflikti, ai fajësoi një rritje “afatshkurtër” të çmimeve të karburantit te veprimet e Iranit dhe këmbënguli se SHBA-ja është bërë e pavarur energjetikisht.

Duke renditur një listë arritjesh, Trump tha se marina dhe forcat ajrore të Iranit ishin shkatërruar, duke e lënë vendin të dobët dhe “jo më një kërcënim” për SHBA-në dhe botën. Megjithatë, ai tha se SHBA do të vazhdojë të godasë Iranin “jashtëzakonisht fort” për disa javët e ardhshme.

“Do t’i kthejmë në epokën e gurit, aty ku i përkasin,” tha ai, ndërkohë që shtoi se diskutimet po vazhdojnë.

Demokratët e kritikuan fjalimin e Trump si “të pakuptimtë” dhe që nuk u përgjigjet pyetjeve më themelore të popullit amerikan.

Senatori demokrat Mark Warner tha në një deklaratë se Trump u detyrohet amerikanëve më shumë përgjigje për një konflikt që ka rritur çmimet e karburantit dhe të mallrave të tjera bazë, me pasoja që do të ndihen në ekonomi për një kohë të gjatë. Senatori Chris Murphy tha: Askush në Amerikë, pasi dëgjoi atë fjalim, nuk e di nëse po përshkallëzojmë apo po e zbusim konfliktin.

Lufta vazhdon, me mijëra të vrarë në Iran dhe në vende të tjera të Lindjes së Mesme që nga 28 shkurti. Sulmet goditën Teheranin të mërkurën në mëngjes. Izraeli tha se kishte kryer dy valë sulmesh ndaj Teheranit dhe pretendoi se kishte vrarë një komandant të lartë të Hezbollahut në Bejrut.

Irani ka vazhduar të kundërpërgjigjet me sulme me raketa në Izraelin qendror dhe në gjithë Lindjen e Mesme – përfshirë një valë sulmesh vetëm disa orë para fillimit të festës hebraike të Pashkës.

Sipas vlerësimeve të Federatës Ndërkombëtare të Kryqit të Kuq dhe Gjysmëhënës së Kuqe, të paktën 1,900 njerëz janë vrarë dhe 20,000 janë plagosur në Iran që nga fillimi i luftës, megjithëse shifrat e sakta janë të vështira për t’u verifikuar.

Në Liban, më shumë se 1,300 njerëz janë vrarë, sipas ministrisë së shëndetësisë së vendit. Shumica e viktimave kanë qenë civilë libanezë, por Hezbollah vlerëson se rreth 400 kanë qenë luftëtarë të tij.

Në Izrael, gjithsej 19 persona janë vrarë dhe 515 janë plagosur që nga fillimi i luftës. Të paktën 13 ushtarë amerikanë janë vrarë dhe qindra të tjerë janë plagosur.

Forcat amerikane kanë goditur më shumë se 12,300 objektiva brenda Iranit që nga fillimi i Operacionit Epic Fury, sipas një deklarate të Komandës Qendrore të SHBA-së.