Policia e Kosovës ka njoftuar se ka përmbyllur me sukses trajnimin 15-ditorë për operimin e sistemeve ajrore pa pilot (dronë) të tipit “Skydio”.

Në trajnim pjesëmarrës ishin 12 zyrtarë policorë, të cilët pas përfundimit të pjesës teorike dhe praktike u certifikuan për përdorim profesional dhe të sigurt të sistemeve ajrore pa pilot.

“Në kuadër të këtij trajnimi janë përfshirë operimi dhe menaxhimin i dronëve, planifikimi i misioneve fluturuese, procedurat operative dhe të sigurisë, përdorimi i sistemeve inteligjente të navigimit si dhe aplikimi operacional në terren, etj.”, ka njoftuar policia.

Përveç këtij trajnimi, Policia e Kosovës ka njoftuar se ka pranuar edhe një donacion në vlerë prej 273 637.22 dollarë nga Ambasada e Shteteve të Bashkuara të Amerikës, përmes programit ATA (Anti-Terrorism Assistance Program), donacion i cili do të kontribuojë në forcimin e kapaciteteve operative dhe teknologjike të njësive policore, duke ndikuar drejtpërdrejt në rritjen e efikasitetit operacional dhe avancimin e sigurisë publike.

“Policia e Republikës së Kosovës shpreh mirënjohje për Ambasadën e ShBA-së, programin ATA, instruktorët dhe partnerët institucionalë për mbështetjen dhe bashkëpunimin e ofruar gjatë realizimit të trajnimit dhe pranimit të donacionit”, ka njoftuar policia.