Kurti: Këtë vit do të kemi municionet e para me vulën “Made in Kosova”
Kryeministri në detyrë, Albin Kurti, bashkë me ministrin në detyrë të Mbrojtjes, Ejup Maqedonci, sot kanë qëndruar në Jahoc të Gjakovës ku kanë vizituar punishten ku po ndërtohet fabrika e municioneve.
Kurti përmes një postimi në Facebook ka thënë se kët vit nga kjo fabrikë Kosova do të ketë municionet e para me vulën: “Made in Kosova”, shkruan Reporteri.net.
Tutje ai ka shkruar se për ushtrinë gjatë katër viteve të ardhshme do të ndahen mbi 1 miliard euro, duke siguruar fuqizim, pajisje moderne dhe trajnime të avancuara për forcën tonë të armatosur.
Postimi i tij:
Bashkë me ministrin Maqedonci në Jahoc të Gjakovës vizituam punishten ku po ndërtojmë fabrikën nga e cila këtë vit do të kemi municionet e para me vulën: “Made in Kosova”.
19 hektarë për industri ushtarake në kuadër të 140 hektarëve si zonë industriale e mbrojtjes me perimetër 6 kilometra, e që ndodhen 500 metra vijë ajrore larg aeroportit ushtarak të Gjakovës dhe 19 kilometra larg poligonit në Babaj të Bokës.
Në hapin e parë historik për vënien e themeleve të industrisë sonë të mbrojtjes do të prodhojmë fishekë të kalibrave 5.56mm dhe 7.62mm, për të vazhduar deri te dronët “Made in Kosova”.
Mandatin e kaluar kemi shumëfishuar buxhetin dhe blerjet sikurse kemi rritur kapacitetet njerëzore.
Për ushtrinë tonë, gjatë katër viteve të ardhshme do të ndajmë mbi 1 miliard euro, duke siguruar fuqizim, pajisje moderne dhe trajnime të avancuara për forcën tonë të armatosur.
