Arsenal ka bërë një hap të madh drejt fitimit të titullit në Premier League, pasi e ka mposhtur minimalisht 1:0 Burnley, duke e mbajtur gjallë ëndrrën për trofeun e parë kampional pas njëzet e dy vitesh. Skuadra e drejtuar nga Mikel Arteta e ka dominuar pjesën më të madhe të takimit dhe ka krijuar raste të mira që në fillim. Fillimisht, Leandro Trossard e ka goditur shtyllën me një tentim nga distanca, ndërsa Burnley i është afruar golit përmes Eberechi Eze, i cili e ka testuar portierin kundërshtar me një goditje të rrezikshme.

Arsenal ka kërkuar edhe penallti kur Bukayo Saka është ndalur pas një dueli me Lucas Pires, por gjyqtari ka lejuar vazhdimin e lojës. Goli vendimtar ka ardhur nga një goditje nga këndi. Kai Havertz ka kërcyer më lart se mbrojtësit dhe ka realizuar me kokë për 1:0, duke i dhënë Arsenal epërsinë. Në pjesën e dytë, Arsenal e ka kërkuar golin e sigurisë, ndërsa Burnley ka pasur një rast të mirë kur tentativa e Eze ka përfunduar mbi traversë pas devijimit të portierit. Megjithatë, vendasit e kanë ruajtur avantazhin dhe kanë siguruar tri pikë shumë të rëndësishme. Kjo ka qenë fitorja e tretë radhazi 1:0 për Arsenal. Çdo hap fals i City mund ta afrojë Arsenal edhe më shumë me titullin, para ndeshjes së fundit të sezonit kundër Crystal Palace. Në anën tjetër, Burnley tashmë i rënë nga liga do të kërkojë fitore në ndeshjen e fundit ndaj Wolverhampton Wanderers për të shmangur një rekord negativ të klubit për numrin më të ulët të fitoreve në elitë.