Armend Thaqi do të vazhdojë të jetë pjesë e Gjilanit edhe në vitet e ardhshme. Klubi i Superligës së Kosovës ka njoftuar se mbrojtësi i krahut të djathtë ka rinovuar kontratën deri në verën e vitit 2028.

Lajmi është bërë me dije nga vetë klubi përmes një njoftimi zyrtar, ku është vlerësuar rëndësia e Thaqit në projektin afatgjatë të skuadrës.

“Pas bisedimeve të zhvilluara në frymë të mirëkuptimit dhe besimit të ndërsjellë, palët kanë vendosur të zgjasin kontratën, duke konfirmuar vazhdimësinë e rrugëtimit të përbashkët dhe objektivave sportive të klubit në vitet e ardhshme. Armend Thaqi do të vazhdojë të jetë pjesë e rëndësishme e projektit të Sport Club Gjilanit, ndërsa klubi shpreh kënaqësinë për arritjen e këtij akordi dhe i uron futbollistit suksese të mëtejshme me fanellën kuqebardhë”, është thënë në njoftimin e Gjilanit.

Thaqi ishte një nga lojtarët kyç të ekipit gjatë sezonit të fundit, ndërsa mbajti edhe shiritin e kapitenit te skuadra gjilanase.

Me rinovimin e kontratës së mbrojtësit 32-vjeçar, Gjilani siguron vazhdimësinë e një prej futbollistëve më me përvojë në ekip dhe një prej liderëve të dhomës së zhveshjes.