Policia e Kosovës ka njoftuar se, pas veprimeve intensive operativo-hetimore, ka arrestuar të dyshuarin kryesor për vrasjen e ndodhur në fshatin Zlipotok të komunës së Dragashit, ku humbi jetën imami i fshatit, Gazmend Zahirovci, 46 vjeç.

Sipas policisë, operacioni për lokalizimin dhe arrestimin e të dyshuarit është zhvilluar me angazhimin e njësive të ndryshme policore, përfshirë përdorimin e dronëve për vëzhgim nga ajri dhe njësisë K-9 me qen gjurmues. Pas disa orësh kërkimesh, i dyshuari është lokalizuar dhe vënë në pranga.

I arrestuari është shoqëruar në stacionin policor, ndërsa ndaj tij po zhvillohen procedurat e mëtejme hetimore në koordinim me prokurorin kompetent.

Sipas Policisë së Kosovës, rasti ka ndodhur rreth orës 23:00, kur një përleshje mes disa personave ka eskaluar me pasoja fatale. Viktima fillimisht është dërguar për trajtim mjekësor në QKMF-në e Dragashit, ku mjeku kujdestar ka konstatuar vdekjen e tij si pasojë e plagëve të marra nga një mjet i mprehtë.

Hetimet për zbardhjen e plotë të rrethanave të ngjarjes janë ende në fazën fillestare dhe pritet të vazhdojnë nga organet kompetente të drejtësisë.