Ish-kryediplomati Enver Hoxhaj ka kritikuar qasjen e Qeverisë Kurti, duke thënë se Kosova nuk mund të ecë përpara nëse pushteti e sheh veten si “pronare e gjithëpushtetshme e shtetit” dhe jo si shërbëtore të qytetarëve.

Sipas Hoxhajt, kur kritika etiketohet si armiqësi, dialogu zëvendësohet me arrogancë dhe vendimmarrja përqendrohet në një dorë, demokracia dobësohet dhe institucionet humbasin autoritetin e tyre.

Ai ka thënë se kryeministri Albin Kurti duhet ta kuptojë se qytetarët nuk presin propagandë, por rezultate dhe përgjegjësi. Hoxhaj ka theksuar nevojën për unitet, dialog dhe bashkërendim të potencialeve politike, ekonomike e shoqërore në funksion të zhvillimit të vendit.

Në reagimin e tij, Hoxhaj ka kërkuar edhe një klimë më të sigurt për biznesin, me siguri juridike, investime të huaja dhe konkurrencë të lirë e të ndershme. Ai ka paralajmëruar se klientelizmi pranë pushtetit dhe klima e “gjuetisë së shtrigave” ndaj bizneseve të konsoliduara dëmtojnë besimin e investitorëve dhe zhvillimin ekonomik.

Sipas tij, interesi shtetëror dhe kombëtar duhet të jetë mbi çdo interes partiak.