Presidenti i Republikës së Shqipërisë, Bajram Begaj, ka pritur sot në një ceremoni zyrtare ambasadorin e jashtëzakonshëm dhe Fuqiplotë të Republikës së Ekuadorit, Esteban Assar Moscoso Bohman, rezident në Romë, i cili i ka paraqitur Letrat Kredenciale.

Kreu i Shtetit i ka uruar ambasadorit suksese në përmbushjen e misionit të tij diplomatik dhe ka shprehur vullnetin për forcimin e marrëdhënieve dypalëshe mes Shqipërisë dhe Ekuadorit, si dhe për zgjerimin e bashkëpunimit në fusha me interes të përbashkët.

Gjatë takimit, Presidenti i Republikës ka vlerësuar bashkëpunimin në kuadër të organizatave ndërkombëtare dhe ka kërkuar që Ekuadori të konsiderojë mundësinë e njohjes së Republikës së Kosovës, duke e cilësuar këtë si një kontribut të rëndësishëm për paqen, stabilitetin dhe sigurinë në Ballkanin Perëndimor.