Partia Demokratike e Kosovës (PDK) dhe Aleanca kanë kërkuar sërish që kryeministri në detyrë, Albin Kurti, të shkojë në Kuvend dhe të mundësojë konstituimin e institucioneve të reja.

Deputetja e Aleancës, Albana Bytyqi, tha se deputetët i kanë votat për konstituimin e Kuvendit dhe kërkoi që Kurti të shkojë në sallën e Kuvendit.

“Sot jemi këtu prapë para Qeverisë, për ta thirrur zotin Albin Kurti që të vijë t’i bëjë institucionet. Ne e dimë që është brenda. Ne e pamë që prapë i kemi votat për konstituimin e Kuvendit. Atëherë, i bëjmë thirrje edhe një herë të vijë, ta bëjë konstituimin dhe pastaj të vazhdojë për zgjedhjen e presidentit. Nuk kemi kohë. Kosova ka humbur shumë kohë. Që dy vjet jemi pa institucione, kështu që është momenti i duhur të vijë në Kuvend dhe t’i krijojë institucionet. E dimë që mbrojtja e Kushtetutës është obligim dhe ne jemi këtu për ta mbrojtur atë. Gjithashtu, do të vazhdojmë ta mbrojmë Kushtetutën dhe asnjëherë nuk do të ndalemi derisa të krijohen institucionet”, tha ajo.