Thibaut Courtois do të mungojë në fushatën e ardhshme të Belgjikës në Nations League, por portieri i Real Madridit nuk ka marrë vendim për t’u pensionuar nga futbolli ndërkombëtar.

34-vjeçari kishte lënë të hapur mundësinë e tërheqjes nga kombëtarja pas Kupës së Botës, ose të merrte një periudhë pushimi gjatë këtij sezoni. Megjithatë, Courtois ka konfirmuar se do të jetë në dispozicion për kualifikueset e Kampionatit Evropian 2028, të cilat nisin në mars të vitit të ardhshëm.

Pas fitores 2-1 të Real Madridit ndaj Interit në Champions League, Courtois deklaroi se trajneri i ri i Belgjikës, Mark van Bommel, e kupton vendimin e tij.

“Do të jem në dispozicion për kualifikueset e Evropianit me kombëtaren. E kuptoj që do të duhet të luftoj për vendin tim, njësoj si portierët e tjerë”, ka thënë Courtois për Het Laatste Nieuws.

Portieri madrilen gjithashtu pranoi se ngarkesa fizike është një shqetësim për të ardhmen.

“Fizikisht, nuk e di nëse mund ta përballoj të njëjtin ritëm edhe për katër vite të tjera”, u shpreh ai.

Belgjika do të zhvillojë gjashtë ndeshje në Nations League gjatë tre muajve të ardhshëm, në një grup ku bëjnë pjesë Franca, Italia dhe Turqia. Megjithatë, Courtois ka zgjedhur të pushojë gjatë kësaj periudhe, duke lënë derën e kombëtares plotësisht të hapur për vitin e ardhshëm.