Liverpooli ka shtyrë negociatat për rinovimin e kontratës me kapitenin Virgil van Dijk, duke shtuar mundësinë që mbrojtësi holandez të largohet nga klubi në verën e vitit 2027 si lojtar i lirë.

Sipas raportimeve të Football Insider, drejtuesit e klubit kanë nisur të shqyrtojnë opsionet për pasuesin e Van Dijkut, në kuadër të një riorganizimi gradual të repartit defensiv.

Van Dijk, i cili aktualisht është 35-vjeçar, po zhvillon sezonin e tij të dhjetë me fanellën e Liverpoolit. Kontrata e tij me klubin skadon në fund të sezonit 2026/27, kur ai do të jetë 36 vjeç.

Mosha e mbrojtësit holandez dhe nevoja për të rinovuar repartin defensiv raportohet të jenë ndër faktorët që kanë ndikuar në qasjen e klubit ndaj një kontrate të re.

Megjithëse Van Dijk vazhdon të jetë titullar dhe një nga liderët e skuadrës, drejtuesit e Liverpoolit po shqyrtojnë ndikimin që një kontratë e re me paga të larta do të kishte në fleksibilitetin financiar të klubit.

Ndërkohë, situatën e mbrojtësit po e monitorojnë disa klube jashtë Anglisë. Skuadrat nga Arabia Saudite kanë shfaqur interes për Van Dijkun, ndërsa në garë mund të përfshihen edhe klube nga MLS-ja dhe Superliga e Turqisë.

Nëse nuk arrihet marrëveshje për vazhdimin e kontratës, Van Dijk do të jetë i lirë të negociojë me klubet e tjera në muajt e fundit të marrëveshjes së tij me Liverpoolin.

Klubi anglez pritet të vazhdojë kërkimet për një qendërmbrojtës të ri, ndërsa e ardhmja e Van Dijkut në “Anfield” mbetet e hapur.