Presidenti ukrainas Volodymyr Zelensky vizitoi dje trupat në vijën e frontit pranë Lymanit, një qytet në Ukrainën lindore ku po zhvillohen luftime të ashpra. Gjatë vizitës, ai bisedoi me ushtarët dhe komandantin e brigadës rreth operacioneve luftarake.

“Dje u takova këtu me ushtarë që kryejnë misione në zonën e Lymanit dhe u dorëzova atyre dekorata shtetërore. Gjithashtu bisedova me komandantin e brigadës për detyrat që po zbaton njësia,” shkroi Zelenskyy në rrjetet sociale, duke e shoqëruar mesazhin me një video nga posti i komandës.

Që nga fillimi i pushtimit rus në shkurt të vitit 2022, presidenti ukrainas ka vizituar shpesh zonat pranë vijës së frontit.

Zelenskyy deklaroi se forcat ukrainase kishin rimarrë disa territore rreth Lymanit si pjesë e një kundërofensive të quajtur “Operacioni Vivaldi”.

Të dyja ushtritë mbeten kryesisht në një gjendje ngërçi përgjatë vijës së gjerë të frontit. Zona e luftimit karakterizohet nga një e ashtuquajtur “zonë shkatërrimi” në të dyja anët, ku dronë të mbushur me eksploziv qarkullojnë në ajër, zbulojnë lëvizje dhe më pas godasin objektivat.

Çdo fitim i rrallë territorial nga cilado palë arrihet me koston e humbjeve të mëdha njerëzore.

Moska synon të marrë nën kontroll të gjithë rajonin lindor ukrainas të Donetskut, të cilin Rusia e konsideron si pjesë të territorit të saj.