Aktorja e njohur amerikane Amanda Seyfried ka zbuluar arsyen pse refuzoi një rol në një serial televiziv, duke pranuar se nuk ndihet më rehat me skenat e shumta intime dhe zhveshjen para personave që nuk i njeh. Aktorja 40-vjeçare foli për këtë çështje gjatë një bisede me Alec Baldwin, në Festivalin Ndërkombëtar të Filmit Hamptons, që u mbajt më 4 tetor në East Hampton, New York. Seyfried shpjegoi se me kalimin e viteve ka ndryshuar mënyra se si e sheh profesionin e saj, veçanërisht kur bëhet fjalë për skenat romantike dhe intime.

“Puna jonë është e çuditshme dhe, ndërsa plakem, bëhet edhe më e çuditshme. Duhet të jemi romantikë me njerëz me të cilët nuk kemi një marrëdhënie romantike”, u shpreh ajo. Aktorja tregoi se dikur i përjetonte ndryshe këto situata dhe se skenat e puthjeve nuk përbënin problem për të. Ajo kujtoi me humor se më parë i shihte ato si një pjesë të zakonshme dhe madje argëtuese të punës, por pranoi se sot qëndrimi i saj ka ndryshuar. Seyfried zbuloi se kishte refuzuar një projekt televiziv pikërisht për shkak të skenave të shpeshta të seksit, duke theksuar se nuk dëshironte të përfshihej në një rol të tillë, pavarësisht se me kë do t’i duhej t’i realizonte ato.

“Refuzova një serial ku do të më duhej të bëja skena seksi gjatë gjithë kohës. Nuk ka rëndësi me kë ishte. Nuk dua ta bëj. Ndihem në siklet me këtë. Nuk është diçka që dua ta bëj tani”, tha aktorja. Megjithatë, ajo la të hapur mundësinë që në rrethana të tjera mund ta shihte ndryshe një ofertë të ngjashme. Sipas saj, vendimi varet edhe nga faza e jetës në të cilën ndodhet dhe nga kufijtë që ka vendosur për veten. Gjatë bisedës, aktorja e nominuar për çmimin Oscar foli edhe për ndikimin që kanë pasur mosha dhe amësia në mënyrën se si zgjedh projektet e saj. Ajo shpjegoi se tashmë është më e vetëdijshme për vendimet që merr dhe për shembullin që u jep fëmijëve të saj, Ninës, 9 vjeçe, dhe Thomasit, 6 vjeç.

“Kam fëmijë që shohin atë që bëj, kështu që duhet të jem më pak e nënshtruar”, u shpreh Seyfried. Përmes këtij rrëfimi, aktorja bëri të qartë se nuk e sheh më pranimin e çdo roli si një domosdoshmëri profesionale. Përkundrazi, ajo po zgjedh të vendosë kufij dhe të refuzojë projektet që nuk përputhen me atë që dëshiron të bëjë në këtë fazë të karrierës së saj.