Aleanca për Ardhmërinë e Kosovës (AAK) vazhdon të këmbëngul që posti i presidentit duhet t’i takojë këtij subjekti politik.

Madje kandidaturën e kryetarit të kësaj partie, Ramush Haradinaj, janë duke e konsideruar si një ofertë serioze për forcat politike në vend.

Smajl Latifi nga AAK-ja ka thënë se Ramush Haradinaj është figurë unifikuese për spektrin politik në Kosovë.

Zgjedhjen e tij si president e sheh si zgjidhje më të mirë në situatën nëpër të cilën po kalon vendi.

“Aleanca me kandidaturën e zotëri Haradinaj për president ka dërguar një mesazh të arsyeshëm të qartë është një ofertë serioze kandidatura e Haradinaj për president dhe besoj që i mbetet tash forcave politike qoftë ato që janë në koalicionin qeverisës, qoftë edhe opozitës që t’i japin një zgjidhje ose një epilog çështjes së zgjedhjes së presidentit. Mendoj se Ramush Haradinaj i plotëson kushtet për të ushtruar një përgjegjësi të lartë për të qenë shef i shtetit edhe i plotëson edhe kriteret edhe njerëzore edhe morale edhe kombëtare por edhe është personalitet i cili luan edhe rolin e një figure i cili e unifikon spektrin politik. Mendoj se zgjedhja e tij mund të jetë një zgjedhje e mirë edhe mendoj që Kosova në kontekstin ku është sot duke marr parasysh edhe zhvillimet”, ka thënë Latifi për “Kosovapress”.

Kryetari i Komunës së Rahovecit, Smajl Latifi, ka thënë se partia nga ai vjen nuk ka vota për ndonjë kandidat tjetër përveç kreut të AAK-së, Ramush Haradinaj.

“Si Aleancë ne tashmë e kemi kandidatin për president i cili bënë mirë dhe i bënë nder për proceset për proceset nëpër të cilat po kalon Kosova….Unë mendoj që Ramush Haradinaj do zgjidhet president nëse do të kemi një kandidaturë tjetër ne do ulemi dhe ta bisedojmë brenda forumeve partiake dhe është vështirë që do të gjendet edhe një personalitet tjetër ku Aleanca mund t’ia jap votën dikujt tjetër për president…ne po punojmë me forcat tjera politike që të arrihet një konsensus që Ramush Haradinaj ta marr miratimin e deputetëve për president ”, ka thënë ai.

Madje, ai ka shprehur gatishmërinë e Aleancës për Ardhmërinë e Kosovës (AAK) edhe për zgjedhje të parakohshme.

“Në situata të tilla kur vendi nuk ka president nuk gjendet zgjidhje për zgjedhjen e presidentit atëherë zgjedhje janë më afër se këmisha e trupit, andaj ne punojmë dhe përgatitemi çdo ditë që ta kërkojmë me respekt besimin e qytetarëve për t’i fituar zgjedhjet qofshin në nivel lokal, apo edhe të jashtëzakonshme”, është shprehur Latifi.

Ndërsa nga Partia Demokratike e Kosovës (PDK) kanë thënë se kësaj partie i takon posti i presidentit. E gjatë kësaj jave kryetari i Lidhjes Demokratike të Kosovës, Isa Mustafa ka thënë se nuk ka gatishmëri mes partive politike për zgjedhjen e presidentit dhe se vendi po rrëshqet drejt zgjedhjeve.