Deputetja e Partisë Demokratike të Kosovës (PDK), Ganimete Musliu, ka kërkuar sqarime nga ministri i Mbrojtjes, Armend Mehaj për pjesëmarrjen e Prindon Sadriut, bashkëshortit të presidentes Vjosa Osmani, në aksionin “Defender Europe 2021”, i cili është mbajtur para disa javësh.

Lidhur me këtë pyetje të Musliut, Mehaj nuk ka dhënë përgjigje.

Megjithatë, ai ka pasur lëvdata për mbarëvajtjen e aksionit dhe pjesëmarrjen e ushtarëve të FSK-së në të.

“Më lejoni të ju informoj se ‘Defender Europe 2021’ ka qenë një operacion i përbashkët i udhëhequr nga ShBA-të. Në këtë ngjarje kanë marrë pjesë 28 shtete, në mesin e tyre edhe mbi 300 ushtarë të FSK-së”, ka thënë ai, duke shtuar se për tu përgjigjur për këtë çështje është komandanti i FSK-së.

“Nuk po lëshohem në deklarata, sepse deklaratat e tilla e minojnë funksionin e këtij aksioni. Është komandanti ai i cili ka raportuar në Komision është deklaruar edhe para mediave, unë jam politik, ai është ushtarak”, ka thënë Mehaj.

Pas kësaj deklarate të Mehajt, ka reaguar deputetja e PDK-së, Ganimete Musliu.

Ajo ka kërkuar shkarkimin e menjëhershëm të ministrit të Mbrojtjes.

“Kërkojë shkarkimin e menjëhershëm të këtij ministri. Ministri i FSK-së që nuk  di kompetencat e veta. Kërkojmë shkarkimin e menjëhershëm të tij”, ka thënë ajo.