Veprimtari Sali Bislimi ka thënë se lajmi për vdekjen bacës Haxhi e ka tronditur edhe më shumë për faktin që ai shkoi në atë botë, vetëm tri ditë pas takimit me të birin e tij, ish-presidentin Hashim Thaçi.

“Përqafimi i fundit babë e bir është simbolik e vuajtjes dhe krenarisë të vetë Kosovës. Një prind si Haxhi Thaçi u takua në spital me të birin që erdhi nga burgu 2000 km larg Kosovës, kjo tregon fatin e papërfunduar të shtetit të Kosovës për të cilin një kontribut të jashtëzakonshëm e dha Hashim Thaçi tri dekada më radhë”, ka shkruar Bislimi në “Facebook”.

Ai ka ngushëlluar familjen Thaçi për bacën Haxhi. “Ngushëllimet me të sinqerta familjes Thaçi e cila edhe në këto momente duhet të gjej forcë, sepse gjithë shqiptaria sot është pranë tyre. U prehtë në paqe shpirti i këtij burri zemërgjerë, që Kosovës ia dha një personalitet të përmasave evropiane!”, ka shkruar Sali Bislimi.