Kryeministri i Kosovës, Albin Kurti, ka bërë të ditur se do t’u dërgojë ftesa partive opozitare për një takim lidhur me çështjen e zgjedhjes së presidentit të vendit.

Ndaj kësaj ftese ka reaguar edhe kryetari i Lidhja Demokratike e Kosovës, Lumir Abdixhiku, i cili ka thënë se është i gatshëm të marrë pjesë në takim, por vetëm pasi të shpallet vendimi i Gjykata Kushtetuese e Kosovës.

Abdixhiku ka shkruar në “Facebook” se e ka falënderuar Kurtin për ftesën.

“Kam falënderuar kryetarin e Lëvizjes Vetëvendosje, z. Kurti, për ftesën për takim për çështjen e Presidentit. E kam njoftuar se do t’i përgjigjem pozitivisht kësaj ftese në ditën e parë pas verdiktit të Gjykatës Kushtetuese”, ka shkruar Abdixhiku.

Ai ka theksuar se përderisa çështja e zgjedhjes së presidentit është në shqyrtim në Gjykatën Kushtetuese, duhet respektuar procesi institucional.

“Duke qenë se çështja e zgjedhjes së Presidentit është tashmë në shqyrtim të Gjykatës Kushtetuese, duhet të kuptojmë se koha jonë politike ndalon përkohësisht, ndërsa koha e dëgjimit kushtetues merr fjalën në pavarësinë e saj”, ka shkruar ai.

Sipas Abdixhikut, respektimi i këtij procesi është në interes të institucioneve të vendit.

“Duke respektuar këtë rend, pa procese të tjera politike paralele, i bëjmë nder jo vetëm vetes, por edhe Republikës dhe institucioneve që janë ndërtuar me shumë mund”, ka shkruar Abdixhiku.

Në fund, ai ka thënë se vendimi i Gjykatës Kushtetuese duhet pritur me qetësi dhe respekt institucional.

“Verdikti i Gjykatës duhet pritur me respekt të plotë institucional dhe me qetësi politike. Një orë pas verdiktit, mund të takohemi sërish”, ka shkruar Abdixhiku.