Gjatë një dekade të luftës në Siri janë vrarë rreth gjysmë milioni njerëz, ka thënë Vëzhguesi Sirian për të Drejtat e Njeriut, me bazë në Britani të Madhe.

Shifra përfshinë edhe 100 000 vdekje të konfirmuara gjatë periudhës së fundit.

Sipas organizatës që nga viti 2011 deri më tani janë regjistruar 494 438 viktima.

“Shumica e këtyre vdekjeve ndodhën midis fundit të 2012-s dhe nëntorit 2015-s”, i ka thënë “AFP”-së, kryetari i organizatës, Rami Abdel Rahman.

Organizata ka përfshirë në të dhënat e fundit një total prej të paktën 57 567 vdekje të ndodhura në burgjet qeveritare dhe qendrat e paraburgimit që nga viti 2011.

Në konflikt janë vrarë 68 393 xhihadistë, shumica anëtarë të grupit Shteti Islamik ose të organizatave të lidhura me Al-Kaidën, si dhe 79 844 rebelë të tjerë.

Konflikti në Siri ka shpërthyer në vitin 2011 pas ndërhyrjes së dhunshme të forcave të sigurisë ndaj protestuesve anti-qeveritarë.

Në konfliktin në Siri, Rusia dhe Irani kanë mbështetur qeverinë e presidentit Bashar al Assad, ndërsa Shtetet e Bashkuara grupe të ndryshme rebele, shkruan “Rel”.

Grupi militant, Shteti Islamik po ashtu ishte i përfshirë në luftën në Siri, por që të gjitha palët e tjera të përfshira në konflikt, e luftuan atë dhe arritën që ta largojnë nga bastionet që kishte brenda territorit sirian. Megjithatë, disa ekstremistë vazhdojnë të mbajnë nën kontroll disa pjesë në provincën veriperëndimore të Idlibit.

Më 27 maj diktatori sirian, Bashar al-Assad është shpallur fitues me 95 për qind të votave dhe rrjedhimisht një mandat të katërt shtatë-vjeçar si president i vendit të shkatërruar nga lufta.

Këto ishin zgjedhjet e dyta presidenciale që kur filloi konflikti 10 vjet më parë.

Opozita dhe vendet perëndimore i kanë quajtur mashtrim.