Kryetari i Komunës së Ferizajt, Agim Aliu, ka njoftuar se nga nesër do të funksionalizohet Tregu i Ri i Kafshëve, një hapësirë moderne e ndërtuar me standarde bashkëkohore për tregtimin e kafshëve dhe produkteve bujqësore.

Në një postim në rrjetet sociale, Aliu ka theksuar se ky treg ofron kushte të plota për shitësit dhe blerësit, përfshirë edhe një hapësirë të veçantë për drithërat, duke e cilësuar këtë projekt si një model për gjithë Kosovën.

“Një hapësirë krejt e re, moderne, me kushtet dhe infrastrukturën e nevojshme për tregtimin e kafshëve, si dhe hapësirën për drithërat – një model i tregjeve të këtij lloji në gjithë Kosovën”, ka shkruar Aliu, duke publikuar edhe një video prezantuese nga ambientet e reja të tregut.

Ky projekt është pjesë e angazhimit të Komunës së Ferizajt për zhvillimin e infrastrukturës rurale dhe përkrahjen e sektorit të bujqësisë dhe blegtorisë.