Ish-Ministri i Brendshëm, Agim Veliu, ka bërë reagimin e parë lidhur me Kuvendin e LDK’së që u mbajtë të shtunën, ku Lumir Abdixhiku u rikonfirmua si kryetar.

Veliu ka thënë se “pas humbjes së thellë të zgjedhjeve nuk shpëtohet duke u kapur pas strukturave të kontrolluara, por duke dëgjuar zërin e bazës”, shkruan Reporteri.net.

Ai ka thënë se anëtarësia është themeli i kësaj partie.

“Asnjë kryetar, asnjë kryesi, as Këshilli i Përgjithshëm dhe as Kuvendi nuk është mbi vullnetin e anëtarëve të LDK-së. Pas humbjes së thellë të zgjedhjeve nuk shpëtohet duke u kapur pas strukturave të kontrolluara, por duke dëgjuar zërin e bazës. LDK nuk është pronë personale, as e një rrethi të ngushtë. Ajo u përket anëtarëve që e kanë ndërtuar, e kanë mbajtur dhe vazhdojnë ta mbajnë”, ka shkruar Veliu.

“Historia e ka treguar se ata që i presin rrënjët, çajnë themelin, e ngatërrojnë rrugën dhe e shndërrojnë shtëpinë e përbashkët në strehë personale, nuk mbahen mend si kryetarë, por si i fundit që del prej saj”, ka shkruar tutje ai.

Delegatët hodhën poshtë dorëheqjen e Abdixhiku me 164 vota kundër, ndërsa 136 te tjerë votuan për.

Votimi u zhvillua në mënyrë të fshehtë, me pjesëmarrjen e 300 delegatëve.