Sportit në Fushë-Kosovë i është shtuar një emër i ri dhe premtues në zhvillimin e futbollit për fëmijë. Bëhet fjalë për Akademinë e Futbollit “Arbëria”, një projekt i ri sportiv i cili para pak muajsh ka nisur zyrtarisht punën me misionin e qartë: zbulimin, zhvillimin dhe edukimin e gjeneratave të reja të futbollistëve.

E themeluar së fundmi, akademia vjen si një iniciativë serioze që synon të krijojë një bazë të fortë të futbollit të moshave të reja në komunën e Fushë-Kosovës dhe më gjerë. Me një qasje moderne dhe profesionale, “Arbëria” synon të shndërrohet në një vatër të rëndësishme të talenteve të ardhshme të futbollit kosovar.

Në krye të këtij projekti qëndrojnë dy figura të përkushtuara të sportit: Arbër Kryeziu, ish-futbollist me përvojë në fushën e blertë dhe Lavdije Behramaj, sportiste aktive me energji dhe përkushtim të vazhdueshëm në sport.

Të dy trajnerët janë duke punuar me përkushtim për të ndërtuar një sistem trajnimi cilësor, i cili i përshtatet nevojave të fëmijëve dhe zhvillimit të tyre afatgjatë.

Sipas stafit drejtues, qëllimi kryesor i akademisë nuk është vetëm mësimi i teknikave të futbollit, por edhe formimi i personalitetit të fëmijëve përmes sportit. Disiplina, respekti, puna në ekip dhe dashuria për lojën janë vlerat kryesore që “Arbëria” synon t’i kultivojë tek çdo fëmijë që i bashkohet akademisë.

Përkundër faktit se është një projekt i ri, interesimi nga prindërit dhe fëmijët ka qenë i menjëhershëm dhe në rritje, duke treguar nevojën dhe dëshirën për struktura profesionale të këtij lloji në rajon.

Trajnimet në Akademinë “Arbëria” zhvillohen me grupe të moshave të ndryshme, ku çdo fëmijë merr vëmendje individuale dhe udhëzim të përshtatur për nivelin e tij. Kjo qasje synon të sigurojë zhvillim të shëndetshëm sportiv dhe progres të qëndrueshëm në kohë.

Themeluesit  kanë shprehur optimistë se “Arbëria” do të jetë më shumë se një akademi futbolli – do të jetë një shkollë jete për fëmijët, ku përmes sportit ata mësojnë vlerat më të rëndësishme për të ardhmen e tyre.

Me këtë nisje të fuqishme, Akademia e Futbollit “Arbëria” synon të pozicionohet si një emër i ri që pritet të ketë ndikim në zhvillimin e futbollit të moshave të reja në Kosovë, duke synuar që në vitet e ardhshme të prodhojë talentë që do të dalin në skenën vendore dhe ndërkombëtare.