Komisioni Qendror i Zgjedhjeve (KQZ) ka marrë vendim për akreditimin e 18 mijë e 41 vëzhguesve të 51 subjekteve politike të certifikuara për pjesëmarrje në zgjedhjet e 12 tetorit.

Lajmin e ka konfirmuar zëdhënësi i KQZ-së, Valmir Elezi.

Ai ka bërë me dije se në mbledhjen e sotme të KQZ-së është prezantuar raporti për dërgimin e pakove me fletëvotime për votuesit e regjistruar jashtë Kosovës, për votim me postë për zgjedhjet e muajit të ardhshëm.

Sipas raportit, KQZ ka nisur përmes postës rreth 44 mijë pako me fletëvotime për votuesit e regjistruar në disa shtete dhe shërbimet postare po i përcjellin te votuesit e regjistruar në adresat e dhëna prej tyre gjatë procesit të regjistrimit.

“Nga ky numër i përgjithshëm, rreth 41 mijë e 879 pako janë dorëzuar në bashkëpunim me Postën e Kosovës dhe 2,050 të tjera përmes postës së shpejtë”.

“Zarfi i cili i dërgohet votuesit, përmban: fletëvotimet; zarfin e fshehtësisë; udhëzuesin me informacione se si plotësohen fletëvotimet dhe si realizohet votimi përmes postës; zarfin kthyes dhe shiritin mbyllës”.

“Në votimin jashtë Kosovës për votim me postë në Zgjedhjet Lokale, detyrë e votuesit është që pakon me fletëvotime ta dërgojë në ndonjërën nga kutitë postare të KQZ-së. Në shumicën e këtyre zarfeve, KQZ-ja ka shënuar paraprakisht adresën e kutisë postare në shtetin përkatës të votuesit të regjistruar. Në rastet kur adresa nuk është shënuar nga KQZ-ja, votuesi duhet ta shënojë njërën nga adresat e kutive postare të KQZ-s”, ka thënë Elezi për “Klan Kosova”.

Periudha e votimit përmes postës, e cila ka filluar më 17 shtator dhe do të përfundojë më 11 tetor, vlen vetëm për 43,933 shtetasit që janë regjistruar suksesshëm si votues jashtë Kosovës.