Një aksident i rëndë ka ndodhur sot në Podujevë mes një kamioni dhe një veture, ku si pasojë ka humbur jetën shoferi i kamionit, ndërsa pesë persona të tjerë kanë mbetur të lënduar.

Bazuar në pamjet nga kamerat e sigurisë, dyshohet se shoferi i kamionit mund të ketë pësuar një sulm shëndetësor para përplasjes.

Rastin e ka konfirmuar zëdhënësja e Policisë për Rajonin e Prishtinës, Florie Ahmeti, e cila njoftoi se trupi i viktimës është dërguar për obduksion.

“Në këtë aksident ngasësi i kamionit ka humbur jetën dhe janë lënduar katër persona të tjerë. Vdekja e viktimës është konstatuar nga ekipi mjekësor në vendngjarje dhe trupi i pajetë është dërguar për obduksion, ndërkohë që personat e lënduar janë dërguar për tretman mjekësor. Me rastin po merret njësiti i trafikut rajonal”, tha Ahmeti.