Suzana Selimi është një emër i njohur për publikun kosovar, si në fushën e këngës, ashtu edhe të aktrimit.

Gjatë karrierës së saj, ajo ka realizuar shumë këngë dhe klipe të pëlqyera nga publiku, por fokusi i saj më i madh ka qenë gjithmonë aktrimi. Që në moshën 14-vjeçare, Suzana nisi të merrte pjesë në paraqitje të ndryshme skenike, skeçe dhe filma.

Së fundmi, ajo ka përfunduar xhirimet e tre filmave. Në dy prej tyre, “Në fund të rrugës” dhe “Hija e tradhtisë”, ajo ka pasur rolet kryesore. Ndërkohë, Selimi ka marrë pjesë edhe në filmin që pritet të jetë ndër më të shikuarit shqiptarë, “Pranvera e përgjakur”, me regji dhe skenar të aktorit të madh Ganimet Bytyqi-Lalushi. Ky film trajton realitetin e luftës, sakrificat dhe kontributin e ushtarëve të UÇK-së kundër okupatorit serb.

Përveç angazhimit në muzikë dhe aktrim, Suzana është mjaft e pranishme edhe në media. Ajo shpesh ftohet në emisione të ndryshme televizive, ku me paraqitjet e saj dëshmon jo vetëm profesionalizëm dhe sukses, por edhe një karakter të fortë njerëzor dhe një edukatë të veçantë, që duket se e ka trashëguar nga familja dhe prindërit e saj.

Ne nuk na mbetet gjë tjetër veçse t’i urojmë Suzana Selimit shëndet dhe suksese të panumërta në karrierë!