Qendërmbrojtësi i Real Madridit, David Alaba, mund të jetë pranë një largimi nga “Los Blancos”. Mediat turke dhe ndërkombëtare raportojnë se gjiganti nga Superliga e Turqisë, Beshiktash, është duke punuar për ta transferuar mbrojtësin austriak, përpara se të mbyllet afati kalimtar më 12 shtator.

Alaba, i cili ka vuajtur nga lëndimet në sezonin e kaluar dhe nuk ka pasur shumë hapësirë në formacionin e Carlo Ancelottit, mund të përfitojë nga një rifillim i karrierës në Stamboll. Beshiktash synon t’i ofrojë një marrëveshje që do t’i garantojë më shumë minuta në fushë – diçka që Alaba e ka pasur të vështirë ta gjejë së fundmi në “Santiago Bernabeu”.

Megjithëse 32-vjeçari ka kontratë me Real Madridin deri në vitin 2026, mungesa e paraqitjeve zyrtare këtë sezon dhe konkurrenca e ashpër në repartin defensiv mund ta shtyjnë të konsiderojë seriozisht një lëvizje drejt Turqisë. Mbetet të shihet në ditët në vijim nëse Alaba do të pranojë ofertën nga klubi turk, i cili është i vendosur ta bëjë pjesë të skuadrës për sezonin aktual.