Alec Baldwin thuhet se ka anuluar projektet tjera pas incidentit në xhirimet e filmit të tij, “Rust”, që la të vdekur kinematografen, Halyna Hutchins, dhe plagosi regjisorin Joel Souza.

Një burim i revistës “People” tha se Baldwin, po kërkon t’i kushtojë pak kohë vetes dhe të ripërqendrohet, siç ka bërë gjatë periudhave të vështira edhe në të kaluarën.

“Kjo ishte shkatërruese për të. Kështu ai i trajton kohët e vështira. Sa herë që ndodh diçka e keqe, në një afat të shkurtër, ai largohet nga sytë e publikut”, ka thënë burimi.

“Ai ishte histerik dhe absolutisht i pangushëllueshëm për orë të tëra pas të shtënave. Të gjithë e dinë se ky ishte një aksident, por ai është absolutisht i shkatërruar”, vazhdoi tutje burimi, shkruan People.

“Nuk ka fjalë për të përcjellë tronditjen dhe pikëllimin tim për aksidentin tragjik që i mori jetën Halyna Hutchins, gruas, nënës dhe koleges sonë shumë të admiruar”, filloi aktori.

“Unë jam duke bashkëpunuar plotësisht me hetimin e policisë për të adresuar se si ndodhi kjo tragjedi dhe jam në kontakt me bashkëshortin e saj, duke i ofruar mbështetjen time atij dhe familjes së tij. Zemra ime është thyer për burrin e saj, djalin e tyre dhe të gjithë ata që e njihnin dhe e donin Halyna”, vazhdoi ai.

Bashkëshorti i Hutchins, Matthew, me të cilin ajo ka një djalë, pohoi se ka qenë në kontakt me Baldwin.

“Kam folur me Alec Baldwin dhe ai na ka dhënë mbështetjen e tij”, ka thënë Matthew për Daily Mail .