Ambasada e Shteteve të Bashkuara të Amerikës (ShBA) në Prishtinë ka përshëndetur zyrtarizimin e shërbimit “Apple Pay” në Kosovë, duke e cilësuar si një hap të rëndësishëm drejt avancimit të ekonomisë digjitale dhe përfshirjes financiare.

Ambasada amerikane ka theksuar mbështetjen për këtë zhvillim dhe rolin që kanë luajtur në nxitjen e investimeve amerikane në vend.

“Lajm i madh për ekonominë digjitale të Kosovës: ‘Apple Pay’ tani është zyrtarisht i disponueshëm! Ambasada e ShBA-së është krenare që ka mbështetur këtë hap të rëndësishëm, i cili pasqyron rolin në rritje të kompanive amerikane që investojnë në të ardhmen e Kosovës”, është thënë në njoftimin e Ambasadës së ShBA-së.

Sipas ambasadës, ky moment historik kontribuon në rritjen ekonomike, përfshirjen financiare dhe modernizimin teknologjik, duke e bërë Kosovën më atraktive për investime dhe inovacion.

Ndërkohë, Banka Qendrore e Kosovës, ka njoftuar të martën se “Apple Pay” është bërë zyrtarisht funksional edhe në Kosovë. Sipas BQK-së, kjo risi u mundëson bankave dhe institucioneve financiare të lidhin kartelat me “Apple Pay”, për të ofruar pagesa të sigurta, të shpejta dhe pa kontakt përmes pajisjeve “Apple” si “iPhone” apo “Apple Watch”.