Sot dhe nesër shënohet Dita Ndërkombëtare e të Zhdukurve me Forcë në Kosovë.

Komisioni Qeveritar për Personat e Zhdukur, përmes një njoftimi ka bërë të ditur se sot nga ora 10:45, mbahen homazhe te Monumenti i Personave të Zhdukur.

Mbi 1600 qytetarë, nëna, baballarë e fëmijë, mbeten ende të zhdukur nga lufta gjenocidale e Serbisë.

Në përpjekje për të ndriçuar fatin e të zhdukurve, lokacionet e gërmimeve mbeten pikë kyçe në procesin e kërkimit dhe identifikimit të mbetjeve mortore.

Komisioni Qeveritar për Persona të Zhdukur po vijon me gërmimet në disa zona të identifikuara, ndërkohë që përgatiten edhe punime të reja bazuar në të dhëna të përditësuara, si brenda territorit të Kosovës ashtu edhe në pritje të hapave konkretë nga pala serbe.

Kryesuesi i Komisionit Qeveritar për Personat e Zhdukur, Andin Hoti, në një prononcim për “Front Online” ka bërë të ditur se deri më tani janë punuar 17 lokacione në Kosovë në kuadër të kërkimeve për personat e zhdukur.

Hoti tregoi se në 7 prej tyre janë zbuluar mbetje mortore.

“17 lokacione është punuar deri më tani në Kosovë, 7 prej tyre ka pasur gjetje të mbetjeve mortore (të cilat janë dërguar për analizë në Laborator të ICMP)”, u shpreh Hoti.

Sipas tij, aktualisht janë përfunduar disa gërmime, derisa pritën edhe 5 lokacione të gërmohet.

“Aktualisht i kemi përfunduar gërmimet në Vushtrri dhe Klinë në një lokacion. Janë edhe minimum 5 lokacione tjera që pritet të ndërmarrin veprim ekipet”, deklaroi Hoti për Front Online.

Ai ka konfirmuar se mbetjet mortore të 9 individëve janë gjetur në lokacionet në Kosovë.

“Mbetjet mortore të se paku 9 individëve janë gjetur, por këtë e vërteton më së miri analiza e ADN-së”, tha Hoti.

Hoti: Po vazhdojmë presionin ndaj Serbisë për fillimin e gërmimeve

Ndërkohë, puna për zbardhjen e fatit të të zhdukurve mbetet sfiduese edhe në Serbi.

Andin Hoti, kryesuesi i Komisionit Qeveritar për Personat e Zhdukur bëri të ditur për “Front Online” se Kosova është ende në pritje për të filluar punimet në lokacionin e Kozhles, ndërsa presioni vazhdon që të fillojnë edhe në Batajnicë.

“Këto janë në Kosovë, ndërsa në Serbi, ende jemi në pritje për të filluar punimet në lokacionin Kozhlje, dhe po e vazhdojmë presionin që të fillohen punimet edhe në Batajnice”.