Izraeli pret që të gjithë 20 pengjet e gjalla të lirohen nga Hamasi nesër në të njëjtën kohë, shkruan The Guardian.

Shosh Bedrosian, zëdhënëse e kryeministrit izraelit Benjamin Netanyahu, dha deklaratën e mëposhtme për mediat në lidhje me mënyrën se si do të funksionojë lirimi i pengjeve nesër në mëngjes:

“Izraeli është i përgatitur dhe gati për të pritur menjëherë të gjitha pengjet tona. Lirimi i pengjeve do të nisë herët në mëngjesin e së hënës. Ne presim që të gjithë 20 pengjet e gjalla të lirohen së bashku, në të njëjtën kohë, tek Kryqi i Kuq dhe të transportohen me gjashtë deri në tetë automjete, pa ndonjë shfaqje të neveritshme nga Hamasi, organizata terroriste.”

Më pas, pengjet do të transportohen drejt forcave izraelite brenda zonave të kontrolluara nga Izraeli në Gaza dhe më pas do të dërgohen në bazën Re’im në jug të Izraelit, ku do të ribashkohen me familjet e tyre.

“Izraeli është gati… nëse ndonjë peng i gjallë ka nevojë për trajtim urgjent mjekësor, do të dërgohet menjëherë në një qendër mjekësore.”

Kryeministri ka udhëzuar Gal Hirsch-in, koordinatorin për të kapurit dhe të zhdukurit, që të bashkëpunojë me Kryqin e Kuq Ndërkombëtar për të organizuar një autokolonë ambulancash për pengjet dhe për të siguruar gjithë pajisjet e nevojshme në rast se ndonjë prej tyre ka nevojë për ndihmë të menjëhershme mjekësore. Në këtë rast, spitalet Soroka dhe Barzilai do të jenë në gatishmëri.

Personel mjekësor do të shoqërojë pengjet gjatë gjithë rrugës së kthimit për në Izrael. Nga baza Re’im, pengjet do të udhëtojnë me familjet e tyre drejt njërës prej tre spitaleve kryesore.

Trupat e pengjeve të vdekur do të vendosen në arkivole të mbuluara me flamuj izraelitë dhe më pas do të dërgohen në një institut mjeko-ligjor për identifikim, shtoi zëdhënësi i qeverisë izraelite.