Avokati kosovar, Ardian Bajraktari, ka thënë se procesi gjyqësor, ndaj krerëve të UÇK-së, pavarësisht ku mbahet, duhet me qenë i drejtë.

Këtë koment e bëri Bajraktari, pas deklaratës së Kryetarës së Gjykatës Speciale, Ekaterina Trendafilova, e cila deklaroi se protestat e veteranëve të UÇK-së, janë treguese pse procedurat gjyqësore po zhvillohen jashtë Kosovës.

“Procesi gjyqësor, pavarësisht ku mbahet, duhet me qenë i drejtë. Përgjegjësja, ndër më të mëdhatë për lejimin e stërkeqjes së procesit gjyqësor ndaj ish krerëve të UÇK-së, paska dhënë aludime të natyrës paragjykuese se çka do të ndodhte nëse ky proces do të zhvillohej në Kosovë”.

“Zonjës së nderuar do bërë me dije se liria e tubimit është e garantuar dhe se transparenca e procesit gjyqësor është rregull, po ashtu barazia e palëve është ndër kushtet themelore për një proces të drejtë sipas ligjit, e këto parime nuk janë marrë në konsideratë, për çka e bëjnë përgjegjëse për lejimin e shkeljeve të shumta përgjatë pesë vjetëve të këtij procesi”, ka thënë Bajraktari, duke shtuar se reagimet ndaj padrejtësive, janë thirrje për reflektim, janë thirrje për drejtësi!.