Barcelona vazhdon të japë sinjale pozitive në prag të sezonit të ri, duke regjistruar një tjetër fitore bindëse në ndeshjet përgatitore. Skuadra e drejtuar nga Hansi Flick triumfoi me rezultatin e thellë 5-0 ndaj Daegu FC, skuadrës koreano-jugore, duke mbyllur turneun aziatik me tri fitore në po aq ndeshje.

Një ndeshje pa shumë histori, ku golin e gjeti edhe sulmuesi i afruar në merkato, Marcus Rashford. Gavi realizoi dopietë, ndërsa golin në pjesën e parë e gjeti edhe Lewandowski. Në pjesën e dytë, përveç Rashford, shënoi edhe Fernandez, për të vulosur shifrat në 5-0.

Barcelona dominoi gjatë gjithë takimit, duke imponuar ritmin dhe cilësinë e saj në të gjitha repartet. Ndeshja e radhës për katalanasit do të jetë miqësorja ndaj Como-s, e fundit para startit të sezonit zyrtar në La Liga. Optimistë dhe në formë, katalanasit synojnë të rikthehen fuqishëm në garën për trofetë.