Bartësi i listës së AAK-së në Deçan, Hajdar Sutaj, u është përgjigjur deklaratave të fundit të një pjesë të opozitës në Deçan se ‘Ramush Haradinaj e Daut Haradinaj po i bashkohen fushatës së AAK-së në këtë komunë’.

Sutaj ka thënë se në Deçan po vijnë Albin Kurti, Glauk Konjufca, Dimal Basha, Donika Gërvalla, ministra e zëvendësministra në detyrë, Lumir Abdixhiku me personalitete të LDK-së, Memli Krasniqi me personalitete të PDK-së, Dardan Molliqaj me eksponentë të PSD-së, por nuk po u dashka të vijë kryetari i AAK-së, ish-kryeministri dhe komandanti Ramush Haradinaj, as deputeti e gjenerali Daut Haradinaj.

“Krenaria jonë kombëtare janë familja Jashari dhe Haradinaj! Ne jemi me fat që jetojmë në epokën e heronjve të gjallë, atyre që na sollën lirinë dhe shtetndërtimin”, ka shkruar Sutaj në “Facebook”.

Postimi i plotë i Sutaj:

Të dashur qytetarë,

Në Deçan po vijnë Albin Kurti, Glauk Konjufca, Dimal Basha, Donika Gërvalla, ministra e zëvendësministra në detyrë, Lumir Abdixhiku me personalitete të LDK-së, Memli Krasniqi me personalitete të PDK-së, Dardan Molliqaj me eksponentë të PSD-së…

Por nuk po bojka me ardhë kryetari i AAK-së, ish-kryeministri dhe komandanti Ramush Haradinaj, as deputeti e gjenerali Daut Haradinaj. Aq më pak kur ai i është bashkuar një takimi në Gllogjan, me bashkëvendasit e tij, në takimin e kandidatit për Kuvend Komunal, z. Mustafë Selmanaj.

Krenaria jonë kombëtare janë familja Jashari dhe Haradinaj!
Ne jemi me fat që jetojmë në epokën e heronjve të gjallë, atyre që na sollën lirinë dhe shtetndërtimin, për të cilat brezat që vijnë do të mësojnë nga historia.