Shefi i Sektorit Politik të BE-së në Kosovë, Boguslaë Gertruda, iu bashkua ministres në detyrë Mimoza Kusari-Lila në shënimin e Ditës Botërore të Akreditimit në një aktivitet të organizuar nga Drejtoria e Akreditimit të Kosovës.

Drejtoria e Akreditimit të Kosovës ka aplikuar për t’u bërë nënshkruese e Marrëveshjes Shumëpalëshe të Akreditimit Evropian (EAMLA), një sistem që siguron njohjen reciproke të vlerësimeve të konformitetit të produkteve të kryera nga organet e akredituara në të gjithë Evropën.

Kjo do të zvogëlonte nevojën për testime dhe certifikime të dyfishta, duke e bërë më të lehtë për produktet e Kosovës qasjen në tregun e BE-së. “BE-ja në Kosovë do të mbështesë Drejtorinë e Akreditimit të Kosovës, organet e vlerësimit të konformitetit të produkteve dhe kompanitë private eksportuese në përpjekjet e tyre për t’u përputhur me rregullat dhe standardet e BE-së, duke ndihmuar në hapjen e rrugës për integrimin e Kosovës në zinxhirët e vlerës industriale të BE-së”, ka thënë Gertruda.

Me mbi 3.7 miliardë euro të investuara që nga viti 1999, BE-ja mbetet partneri më i fortë i Kosovës dhe ofruesi më i madh i ndihmës financiare.

Plani i Rritjes i BE-së dhe zbatimi i Agjendës së Reformës i ofrojnë Kosovës një mundësi unike për t’u integruar gradualisht në Tregun e Përbashkët të BE-së, duke krijuar mundësi të reja për bizneset, ekonominë dhe qytetarët.