Presidenti i Shqipërisë, Bajram Begaj, është takuar me presidentin e Ganës, John Dramani Mahama, gjatë Asamblesë së Përgjithshme të Kombeve të Bashkuara në Nju Jork.

Në një postim në rrjetin “X”, Begaj bëri të ditur se në fokus të bisedës ishin forcimi i bashkëpunimit dypalësh dhe shumëpalësh, si dhe konfirmimi i njohjes së Kosovës nga ana e Ganës.

“Sot në OKB, u takova me presidentin e Ganës, JDMahama, për të diskutuar avancimin e bashkëpunimit tonë dypalësh dhe shumëpalësh, si dhe për të konfirmuar njohjen e Kosovës nga ana e Ganës. Shqipëria mbetet e përkushtuar ndaj forcimit të pozicionit ndërkombëtar të Kosovës.”, shkroi Begaj në postim.