Ish-deputeti i Partisë Demokratike të Kosovës (PDK), Artan Behrami, në emisionin “Real Talk me Maxhunin”, që transmetohet në Periskopi dhe T7, ka thënë se e kanë pasur të vështirë këta muaj të funskionimit të Kuvendit, sepse nuk kanë arritur asnjëherë as të mbajnë fjalim në Kuvend.

Behrami, që është hera e parë që është bërë pjesë e Kuvendit, konsideron se Lëvizja Vetëvendosje është fajtori kryesore që është bllokuar jeta institucionale në Kosovë, duke nisur nga Kuvendi e Qeveria.

“Në këto 7-8 muaj të Kuvendit, Lëvizja Vetëvendosje në krye me Kurtin i ka okupuar institucionet dhe Kuvendin, përmes Avni Deharit si deputeti më i moshuar që ka fuqinë e drejtimit të seancave, e më pas bllokadave artificiale që i ka krijuar, vetëm e vetëm që të kemi një bllokad, që ta kemi të pamundur jetësimin e premtimeve që i kemi dhënë”, ka thënë Behrami.

Ai ka thënë se Kosova ka nevojë për një njeri normal që ta drejtojë Qeverinë.

“Ne besojmë se Bedri Hamza do të jetë kryeministër i Kosovës, që t’ia japim vendit një kryeministër normal, të parashikueshëm, që ofron një transformim ekonomik dhe shoqëror dhe rikthen marrdhëniet me SHBA-të”, ka thënë Behrami./Periskopi