Kreu i Partisë Demokratike, Sali Berisha, ka sqaruar të hënën qëndrimin e tij lidhur me protestën në mbështetje të krerëve të UÇK-së që u zhvillua në Tiranë. Ai e ka nisur fjalën e tij duke u dhënë përgjigje raporteve se deputeti i PD-së, Bujar Leskaj, kishte shkelur urdhrin e partisë.

“Së pari, në lidhje me deklaratën e Bujar Leskajt, dua të theksoj se nuk ka pasur urdhër për të marrë pjesë apo për të mos marrë pjesë në protestën e Organizatës së UÇK-së”, ka thënë Berisha.

Ai ka thënë gjithashtu që ka shprehur konsideratat e tij personale për këtë kauzë. “Unë mbështes luftën e drejtë të udhëheqësve dhe luftëtarëve të UÇK-së dhe kam shprehur konsideratat e mia për këtë”, ka thënë Berisha.

Berisha ka akuzuar kryeministrin Edi Rama për manipulim të kauzës së UÇK-së ndërsa e kritikoi për refuzimin e rezolutës për gjenocidin serb, duke cilësuar anëtarët e mazhorancës si “antishqiptarë të betuar”. “Të hedhësh poshtë rezolutën për gjenocidin serb tregon se je antishqiptar i betuar, një argat mjeran i nacionalizmit serb”, ka thënë Berisha, duke shtuar se gjenocidi ndaj shqiptarëve ka vazhduar gjatë gjithë historisë.

“Shqiptarët kanë përjetuar dhunë barbare nga serbët. Trocky shkruante se Vardari ishte mbushur plot me trupa shqiptarësh pas betejës së Kumanovës. Gjenocidi ndaj shqiptarëve është kryer gjatë gjithë kohës, deri tek ato moderne”, ka thënë Berisha.