Paketa e mbështetur nga BE-ja do të nxisë digjitalizimin e NVM-ve dhe tranzicionin e gjelbër në vend.

15 milionë euro hua për NVM-të për të nxitur financimin e bizneseve të vogla dhe investimet e gjelbra

5 milionë euro hua Go Digital për të avancuar automatizimin, digjitalizimin dhe qëndrueshmërinë

Huaja Go Digital do të mbështetet nga BE-ja me grante stimuluese dhe asistencë teknike përmes Kornizës së Investimeve për Ballkanin Perëndimor (WBIF)

Banka Evropiane për Rindërtim dhe Zhvillim (BERZH) po forcon mbështetjen për sektorin financiar të Kosovës me një paketë të re financiare prej 20 milionë eurosh për NLB Bankën Prishtina. Kjo marrëveshje do të zgjerojë qasjen e ndërmarrjeve të vogla dhe të mesme (NVM) në financim dhe do të promovojë transformimin digjital në vend.

Paketa financiare për NLB Banka Prishtina përbëhet nga dy komponentë kryesorë:

• Një hua deri në 15 milionë euro për NVM-të, e cila është linja e dytë e kredisë për NVM-të e ofruar nga BERZH për NLB Banka Prishtina. Kjo do të rrisë disponueshmërinë e financimit për NVM-të private në Kosovë, duke promovuar sipërmarrjen dhe konkurrueshmërinë. Banka do të synojë të alokojë të paktën gjysmën e fondeve për projekte që përputhen me qasjen e BERZH-it për Tranzicionin në Ekonominë e Gjelbër (GET), duke mbështetur investime në efiçiencë të energjisë, energji të rinovueshme dhe nisma të tjera të qëndrueshme.
• Një hua e thjeshtë deri në 5 milionë euro në kuadër të programit “Go Digital in the Western Balkans” të BERZH-it, një program i mbështetur nga Bashkimi Evropian (BE). Ky program do t’u ndihmojë NVM-ve të investojnë në automatizim, digjitalizim dhe teknologji të gjelbra, me të paktën 60% të investimeve që përmbushin kriteret e GET. Programi gjithashtu synon të promovojë qasje të barabartë në financim për NVM-të e udhëhequra nga gratë, duke forcuar konkurrueshmërinë dhe qëndrueshmërinë e tyre. NVM-të do të përfitojnë nga grante stimuluese të financuara nga BE deri në 10% të shumës së huasë, si dhe nga një paketë gjithëpërfshirëse asistence teknike, të dyja të kanalizuara përmes WBIF.

Sergiy Maslichenko, Drejtor i BERZH-it për Kosovën, u shpreh: “NVM-të janë shtylla kurrizore e ekonomisë së Kosovës, dhe mbështetja e rritjes konkurrueshmërisë dhe digjitalizimit të tyre është thelbësore për misionin tonë. Kjo paketë financiare me NLB Banka Prishtina do t’u mundësojë bizneseve vendase të investojnë në inovacion, qëndrueshmëri dhe teknologji të gjelbra, duke siguruar njëkohësisht qasje më të madhe në financim për ndërmarrjet e udhëhequra nga gratë.”

NLB Banka Prishtina është partnere afatgjatë e BERZH-it dhe pjesë e Grupit NLB, me seli në Slloveni dhe degë në të gjithë Ballkanin Perëndimor. Ajo është banka e dytë më e madhe tregtare në Kosovë, me fokus të fortë në kreditimin e NVM-ve dhe bizneseve korporative.

Gem Maloku, Kryetar i Bordit Ekzekutiv të NLB Banka Prishtina, tha: “Ky partneritet me BERZH-in shënon një tjetër moment të rëndësishëm në angazhimin tonë për të avancuar rritjen ekonomike dhe qëndrueshmërinë e Kosovës. Përmes kësaj pakete financiare, ne po fuqizojmë bizneset vendore të përqafojnë inovacionin, transformimin digjital dhe qëndrueshmërinë. Në NLB Banka Prishtina besojmë se mbështetja e NVM-ve në tranzicionin e tyre të gjelbër dhe digjital është thelbësore jo vetëm për konkurrueshmërinë e tyre, por edhe për ndërtimin e një të ardhmeje më të qëndrueshme dhe gjithëpërfshirëse për vendin tonë, duke e bërë atë të gatshëm për ekonominë digjitale.”

BERZH është investitori institucional kryesor në Kosovë, me një investim kumulativ prej 827 milionë eurosh në 133 projekte deri më sot.