Sipas transkriptit të intervistës, të publikuar më 23 qershor, Gates deklaroi se Jeffrey Epstein kishte marrë informacion për jetën e tij personale dhe kishte tentuar të përdorte këto të dhëna për ta bindur që të rilidhte kontaktet me të.

“Pas kësaj mësova se Epstein kishte marrë informacion për jetën time personale, përfshirë faktin që kisha qenë i pabesë në martesën time. Këto marrëdhënie nuk kishin asnjë lidhje me ndërveprimet e mia me Epstein, por ishin të dhimbshme për familjen time”, u shpreh Gates.

Biznesmeni 70-vjeçar përmendi lojtaren e bridge-it Mila Antonova, shkencëtaren bërthamore Karima Nigmatulina dhe doktoreshën Alice Jacobs Nesselrodt si gratë me të cilat kishte pasur marrëdhënie jashtëmartesore.

Gates, i cili u divorcua nga Melinda French në vitin 2021 pas 27 vitesh martesë, theksoi se marrëdhënia e tij me Epstein mes viteve 2011 dhe 2014 kishte qenë vetëm profesionale.

Ai shtoi se, ndonëse Epstein nuk e kishte shantazhuar drejtpërdrejt, ekzistonte mundësia që ai të kishte menduar ta bënte një gjë të tillë.

“Ai kurrë nuk më shantazhoi drejtpërdrejt, por duke parë këto email-e, ngre një probabilitet serioz që ai kishte menduar të më shantazhonte”, deklaroi Gates.