Zëvendëskryeministri në detyrë, Besnik Bislimi, ka dalë nga prokuroria, ku është intervistuar për rastin Peci.

Bislimi pasi ka dalë nga Prokuroria Speciale e Kosovës nuk i është përgjigjur interesimit të medieve.

Bislimi, është paraqitur në Prokurorinë Speciale të mërkurën për intervistim lidhur me hetimet rreth dhënies me qira të fabrikës për përpunimin e nënprodukteve shtazore nga Ministria e Bujqësisë.Ministri në detyrë i Bujqësisë, Faton Peci, e ka përmendur Bislimin për çështjen e funksionalizimit të kësaj fabrike.

Në fund të majit, Prokuroria Speciale ka urdhëruar bastisje në katër lokacione të ndryshme në Prishtinë e Ferizaj lidhur me dyshimet për keqpërdorim të kontratës për dhënien me qira të këtij impianti.

Ministri Peci ishte intervistuar në cilësinë e të dyshuarit. Pos tij, qe intervistuar edhe kryeshefi i Agjencisë së Ushqimit dhe Veterinës, Bekim Hoxha. Pas intervistimit, Peci pati thënë se ka vepruar në interes të publikut.