BQK-ja dhe MFT-ja diskutojnë planin e rimëkëmbjes ekonomike me drejtuesit e bankave komerciale
Me ftesë të guvernatorit të Bankës Qendrore të Republikës së Kosovës (BQK), Fehmi Mehmeti dhe ministrit në detyrë të Ekonomisë dhe Transfereve (MFT), Besnik Bislimi është organizuar një takim i përbashkët me të gjithë drejtuesit e bankave komerciale që operojnë në Kosovë.
Qëllimi i këtij takimi ishte diskutimi i zhvillimeve dhe masave të deritanishme për të ndihmuar përballjen e ekonomisë me pasojat e shkaktuara nga pandemia Covid-19, si dhe diskutimi i planit të rimëkëmbjes së ekonomisë për periudhën në vijim.
Me këtë rast, guvernatori i BQK-së, ka vlerësuar lart konstruktivitetin e treguar nga sektori bankar gjatë kësaj periudhe, duke iu përgjigjur pozitivisht nevojave të ekonomisë përmes lehtësimeve që ju kanë bërë huamarrësve.
Guvernatori Mehmeti ka shprehur bindjen se sektori bankar, i cili gëzon një shkallë të lartë të qëndrueshmërisë dhe potencial për të rritur edhe më tej kreditimin e ekonomisë, do të luajë një rol kyç gjatë fazës së rimëkëmbjes ekonomike duke shërbyer si partner i besueshëm i institucioneve, në përpjekjet për të ndihmuar rikuperimin dhe zhvillimin e mëtejmë ekonomik të vendit.
Vlerësim të lartë për punën e sektorit bankar gjatë kësaj periudhe, ka shprehur edhe ministri në detyrë i MFT-së Besnik Bislimi, i cili së bashku me zëvendësministrin Ilir Aliu, kanë prezantuar para drejtuesve të bankave edhe planin për rimëkëmbje ekonomike, i cili po përgatitet nga një grup punues që përfshin përfaqësues të Qeverisë, BQK-së dhe bizneseve.
Në thelb të këtij plani gjendet skema për garantimin e kredive, përmes së cilës synohet rritja e financimit kreditor dhe përmirësimi i kushteve të financimit për bizneset dhe individët.
Nga ana tjetër, Albert Lumezi, kryetar i Bordit të Shoqatës së Bankave të Kosovës, ka shprehur falënderimin për reagimin e shpejtë të BQK-së për sa i përket masave rregullative në raport me menaxhimin e situatës së krijuar gjatë pandemisë, si dhe mirëpriti iniciativën për krijimin e planit të rimëkëmbjes ekonomike, duke shfaqur gatishmërinë e sektorit bankar për të kontribuuar në këtë proces.
Të gjitha palët janë pajtuar për ta vazhduar bashkëpunimin e ngushtë në procesin e finalizimit të planit të rimëkëmbjes ekonomike dhe për domosdoshmërinë e fillimit sa më të shpejtë të implementimit të një plani të tillë në mënyrë që të minimizohen pasojat ekonomike të pandemisë dhe të ndihmohet rimëkëmbja dhe zhvillimi ekonomik i vendit. (L.G/ Epoka e re)